US चौतारी ,डेक्स,USA
पढ्न लाग्ने समय १ मिनेट,
नाटक ‘समर लभ’ ले कान्तिपुर थिएटरमा तहल्का मच्चयो। सुविन भट्टराईको सर्वाधिक चर्चित उपन्यासमा आधारित, सम्राट भुजेलको निर्देशनमा तयार भएको नाटक समर लभ श्रावण २९ गतेदेखि मञ्चन सुरु भएको थियो । यसअघि कान्तिपुर थिएटरले मञ्चन गरेको ‘सेतो धरती’ ले १०१ कीर्तिमानी शो सम्पन्न गर्दै नेपाली रंगमञ्चमा नयाँ इतिहास रचेको थियो। 
‘समर लभ’ को अर्को विशेष आकर्षण अभिनेता अर्पण थापा हुन्। नेपाली चलचित्रका चर्चित अभिनेता थापाले यस नाटकमार्फत पहिलो पटक रंगमञ्चमा अभिनय गरेका छन्। मुख्य भूमिकामा सागर खनाल, वास्ना तिमिल्सिना, विनिता गिरि, ब्रबिम बस्नेत, रक्षा गौतम, सनम श्रेष्ठ र जानकी बजगाईं रहेका छन्।
कान्तिपुर थिएटर नेपाली चलचित्र, साहित्य र रंगमञ्चबीचको सेतुका रूपमा स्थापित हुँदै गएको देखिन्छ। अर्पण थापासँगै रेखा थापा, जीवन लुइँटेल, बेनिशा हमाल, शनिशा भट्टराई, मनोज गजुरेललगायत कलाकारहरूले पनि यही थिएटरबाट पहिलो पटक रंगमञ्चमा अभिनय गरेका थिए। यसले चलचित्रका चर्चित कलाकारहरूलाई रंगमञ्चतर्फ आकर्षित गर्दै आएको छ।
कान्तिपुर फिल्म एकेडेमीको थिएटर प्रोडक्सन ‘समर लभ’ बुधबार बाहेक हरेक दिन दिउँसो १:१५ बजे र साँझ ५:१५ बजे मञ्चन भईरहेको छ । करिब १ घण्टा ५० मिनेट लामो नाटकको टिकट कान्तिपुर थिएटरको वेबसाइटमार्फत अनलाइन बुकिङ गर्न सकिने व्यवस्था रहेको छ ।
यसैबीच, कान्तिपुर थिएटरको चर्चित नाटक ‘सेतो धरती’ अब विराटनगर, पोखरा र चितवनमा पनि मञ्चन हुने तयारी छ। काठमाडौंमा ‘समर लभ’ र मोफसलमा ‘सेतो धरती’ को मञ्चनले नेपाली रंगमञ्चको आयतन अझ फराकिलो बनाउने विश्वास कान्तिपुर थिएटरले लिएको छ। 
